شارجه کان ڪراچي ايندڙ لاپتا ڪارگو جهاز بابت ڪمپني جو بيان سامهون اچي ويو آهي.
ڪمپني موجب، ڪارگو جهاز گذريل رات شارجه کان ڪراچي اچي رهيو هو، جنهن جو رات 9 لڳي 21 منٽن تي ايئر ٽريفڪ ڪنٽرول سان رابطو اوچتو ختم ٿي ويو.
اعلاميي موجب جهاز ۾ پنج ماڻهو سوار هئا، جن ۾ پائلٽ محمد رضوان ادريس، فرسٽ آفيسر فيصل محمود، لوڊ ماسٽر محمد توفيق، انجنيئر عارف صديقي ۽ محمد حامد شامل هئا.
هوڏانهن ذريعن موجب، رڪارڊ محفوظ رکڻ لاءِ جناح ايئرپورٽ تي نجي ڪمپني جي آفيس کي سيل ڪيو ويو آهي.
ايئر ٽريفڪ ڪنٽرولر موجب، لاپتا جهاز جي پائلٽ آخري لمحن ۾ "مي ڊي" ايمرجنسي ڪال نه ڏني. امڪان آهي ته هنگامي صورتحال سبب کيس اهڙو موقعو ئي نه مليو.
ذريعن جو چوڻ آهي ته جهاز فني خرابي کانپوءِ مرمت لاءِ شارجه موڪليو ويو هو، جتي اهو پنج ڏينهن رهيو. مرمت مڪمل ٿيڻ بعد جهاز خالي حالت ۾ فيري فلائيٽ ذريعي ڪراچي واپس اچي رهيو هو.
ذريعن موجب، شارجه ۾ جهاز جي مرمت Northern Techniques نالي ڪمپني ڪئي هئي.
پاڪستان ايئرپورٽس اٿارٽي جي ترجمان موجب، واقعي کان پوءِ ريسڪيو ڪوآرڊينيشن سينٽر فوري طور فعال ڪيو ويو، جڏهن ته لاپتا جهاز جي ڳولا لاءِ عربي سمنڊ ۾ سرچ اينڊ ريسڪيو آپريشن جاري آهي، جنهن ۾ مختلف ادارا حصو وٺي رهيا آهن.
ٻئي طرف وزيراعظم جهاز جي لاپتا ٿيڻ تي ڏک جو اظهار ڪندي عملي جي پنجن ئي ميمبرن جي وارثن سان همدردي ظاهر ڪئي آهي. هن سول ايوي ايشن، پاڪ بحريه ۽ پاڪ فضائيه کي امدادي ڪارروايون تيز ڪرڻ ۽ هر ممڪن وسيلا استعمال ڪرڻ جي هدايت پڻ ڪئي آهي.
