رهائش لاءِ دنيا جو بهترين شهر ڪهڙو؟ ڪراچي ڪهڙي نمبر تي آيو؟
اڪنامسٽ انٽيليجنس يونٽ (EIU) سال 2026 لاءِ رهائش جي لحاظ کان دنيا جي بهترين شهرن جي فهرست جاري ڪري ڇڏي آهي.
جيڪڏهن توهان کي دنيا جي ڪنهن اهڙي شهر ۾ رهڻ جو موقعو ملي، جتي بهترين صحت جون سهولتون، معياري تعليم، جديد ٽرانسپورٽ، صاف سٿرو ماحول ۽ پُرسڪون زندگي موجود هجي، ته توهان ڪهڙي شهر کي چونڊيندا؟ هن سوال جو جواب اڪنامسٽ انٽيليجنس يونٽ جي تازي گلوبل لائيوئبلٽي انڊيڪس 2026 رپورٽ ڏئي ڇڏيو آهي.
ڊينمارڪ جي گاديءَ واري شهر ڪوپن هيگن لڳاتار ٻئي سال به پهرين نمبر تي رهي دنيا جو رهائش لاءِ بهترين شهر قرار ڏنو ويو آهي. هن شهر استحڪام، تعليم ۽ بنيادي ڍانچي جي شعبن ۾ مڪمل نمبر حاصل ڪيا، جڏهن ته ثقافت ۽ ماحول جي حوالي سان پڻ نمايان ڪارڪردگي ڏيکاري.
ڪوپن هيگن کان پوءِ فهرست ۾ ٻئي نمبر تي آسٽريا جو ويانا، ٽئين نمبر تي آسٽريليا جو ميلبورن، چوٿين نمبر تي سڊني ۽ پنجين نمبر تي سوئٽزرلينڊ جو زيورخ شامل آهن.
ڇهين کان ڏهين نمبر تائين ترتيبوار جنيوا (سوئٽزرلينڊ)، اوساڪا (جاپان)، ايڊيليڊ (آسٽريليا)، وينڪوور (ڪينيڊا) ۽ ٽوڪيو (جاپان) شامل آهن.
هن رپورٽ جي تياري دوران مختلف شهرن جي رهواسين سان پڻ ڳالهه ٻولهه ڪئي وئي. ڪوپن هيگن جي رهواسين موجب هتي سائيڪل هلائڻ روزاني زندگي جو حصو آهي، ماڻهو ڪم کان پوءِ سمنڊ ۾ ترڻ وڃن ٿا ۽ ڪجهه ئي منٽن ۾ پنهنجي گهر پهچي وڃن ٿا.
ويانا جي رهواسين بهترين پبلڪ ٽرانسپورٽ، پُرسڪون طرزِ زندگي ۽ تاريخي حسن کي پنهنجي شهر جي سڃاڻپ قرار ڏنو، جڏهن ته ميلبورن جي رهواسين مختلف ثقافتن، ڪيفي ڪلچر، آرٽ ۽ موسيقي کي پنهنجي زندگي جو اهم حصو قرار ڏنو.
سڊني جي رهواسين موجب سمنڊ، ساحل، فطرت ۽ گهڻ ثقافتي ماحول هن شهر کي دنيا جي منفرد ترين شهرن مان هڪ بڻائين ٿا، جڏهن ته زيورخ جي رهواسين صاف پاڻي، ڍنڍن، دريائن ۽ غيرمعمولي صفائي کي پنهنجي شهر جو سڀ کان وڏو حسن قرار ڏنو.
ڪراچي ڪهڙي نمبر تي آيو؟
رپورٽ موجب پاڪستان، ڀارت ۽ بنگلاديش جو ڪو به شهر دنيا جي ٽاپ 10 بهترين شهرن ۾ شامل نه ٿي سگهيو. ڪراچي لڳاتار ٻئي سال به 170هين نمبر تي رهيو. ان کان پوءِ ڍاڪا 171هين، طرابلس 172هين ۽ دمشق 173هين، يعني آخري نمبر تي رهيو.
اڪنامسٽ انٽيليجنس يونٽ جي مڪمل درجابندي موجب ڏکڻ ايشيا جي شهرن جي ڪارڪردگي نسبتاً گهٽ رهي، جنهن جا اهم سبب سياسي ۽ معاشي استحڪام، صحت جون سهولتون، بنيادي ڍانچو، ماحولياتي معيار ۽ شهري سهولتن سان لاڳاپيل چئلينجن کي قرار ڏنو ويو آهي.
