ڪراچي ۾ چوري ٿيل گيس پلاسٽڪ جي وڏن ٿيلهن ۾ ڀري ان مان بجلي پيدا ڪندڙ هڪ منظم ٽولي کي گرفتار ڪيو ويو آهي.

جيو نيوز موجب سوئي سدرن جي اختيارين ڪراچي جي علائقي گلزار هجري ۾ ڇاپو هڻي ٽن ڄڻن کي گرفتار ڪيو، جيڪي گيس چوري ڪري پلاسٽڪ جي ٿيلهن ۾ ڀريندا هئا ۽ پوءِ ان ذريعي بجلي تيار ڪندا هئا.

سوئي سدرن جي ترجمان موجب جوابدار چوري ٿيل گيس تي هلندڙ ٻه گيس جنريٽر استعمال ڪري رهيا هئا. ڪارروائي دوران 33 ڪي وي اي جا ٻه ۽ 41.3 ڪي وي اي جو هڪ گيس جنريٽر هٿ ڪيو ويو، جن ذريعي لڳ ڀڳ 300 فليٽن ۽ 100 دڪانن کي غيرقانوني طور بجلي فراهم ڪئي پئي وئي.

اختيارين موجب جوابدار غيرقانوني بجلي فراهم ڪرڻ جي عيوض صارفين کان لڳ ڀڳ 20 هزار رپيا ايڊوانس ۽ 2 هزار رپيا ماهوار وصول ڪندا هئا.

سوئي سدرن جي ترجمان ٻڌايو ته ڪارروائي دوران گيس چوري لاءِ استعمال ٿيندڙ سموريون غيرقانوني پائيپ لائينون ختم ڪيون ويون ۽ جنريٽرن ڏانهن ويندڙ غيرمجاز گيس سپلاءِ پڻ بند ڪئي وئي.

ترجمان موجب اها ڪارروائي پوليس جي موجودگي ۾ ڪئي وئي، جڏهن ته جوابدارن رحمت الله، حيات مسعود ۽ سليم مسعود خلاف ڪيس داخل ڪيو ويو آهي.

اختيارين خبردار ڪيو آهي ته ڇتين تي رکيل وڏن ٿيلهن ۾ ڀريل گيس ڪنهن به وقت بم وانگر ڦاٽي وڏي تباهي جو سبب بڻجي سگهي ٿي.