بالي ووڊ سپر اسٽار سلمان خان کي ان جي زندگي سان مشابهه رکندڙ متنازع فلم ’’ڪالا هرن: دي بيٽل فار ليگيـسي‘‘ خلاف داخل ڪيس ۾ فوري ڪاميابي حاصل نه ٿي سگهي.

دهلي هاءِ ڪورٽ ڪيس جي ٻڌڻي پهرين جولاءِ تائين ملتوي ڪندي عبوري رليف جي درخواست منظور ڪرڻ کان انڪار ڪري ڇڏيو.

جسٽس مدھو جين تي مشتمل بينچ ٻڌڻي دوران سلمان خان جي قانوني ٽيم کي هدايت ڪئي ته هو ڪيس سان لاڳاپيل سمورا دستاويز ۽ رڪارڊ فلم سازن جي وڪيلن کي فراهم ڪن ته جيئن هو مڪمل تياري سان پنهنجو موقف عدالت آڏو پيش ڪري سگهن.

سلمان خان عدالت کان درخواست ڪئي هئي ته فلم جي نمائش روڪي وڃي، ڇاڪاڻ ته سندس مطابق فلم ۾ 1998 جي مشهور ڪالا هرن شڪار ڪيس ۽ گينگسٽر لارنس بشنوئي سان مبينا تڪرار کي سندس اجازت کان سواءِ ڏيکاريو ويو آهي.

سندس وڪيل سنديپ سيٺي عدالت ۾ موقف اختيار ڪيو ته فلم بنيادي طور تي سلمان خان جي زندگي مان متاثر ٿي ٺاهي پئي وڃي، جڏهن ته نه ته اجازت ورتي وئي آهي ۽ نه ئي قانوني حق حاصل ڪيو ويو آهي.

وڪيل موجب فلم ۾ سلمان خان جو نالو سڌو استعمال نه ڪيو ويو آهي، پر مرڪزي ڪردار، ڪهاڻي ۽ منظر واضح طور تي سندس شخصيت سان ملن ٿا. هن عدالت کي اهو به ٻڌايو ته ٽيزر ۾ ڪردار هٿيار سان ڏيکاريو ويو آهي، جيڪو غلط تاثر پيدا ڪري سگهي ٿو.

ٻئي طرف فلم سازن جي وڪيلن موقف اختيار ڪيو ته کين مڪمل دستاويز نه مليا آهن، تنهنڪري هو تفصيلي جواب ڏيڻ جي پوزيشن ۾ ناهن. عدالت فائنل ٻڌڻي لاءِ پهرين جولاءِ جي تاريخ مقرر ڪري ڇڏي۔