چين هڪ ڀيرو ٻيهر پنهنجي شاندار تعميراتي صلاحيتن سان دنيا جي ڌيان جو مرڪز بڻجي ويو آهي. هن ڀيري ملڪ هڪ اهڙو منفرد هوائي اڏو تعمير ڪري رهيو آهي، جيڪو زمين تي نه پر سمنڊ جي مٿان هڪ مصنوعي ٻيٽ تي قائم ڪيو پيو وڃي. ڊاليان جنزهووان انٽرنيشنل ايئرپورٽ نالي هي منصوبو جديد انجنيئرنگ جو شاهڪار قرار ڏنو پيو وڃي.

هي ايئرپورٽ جنزهووان بي ۾ 7.7 چورس ميل ايراضيءَ تي تعمير ٿي رهيو آهي ۽ چين جو پهريون اهڙو هوائي اڏو هوندو جيڪو مڪمل طور سامونڊي پاڻيءَ مٿان ٺهيل مصنوعي ٻيٽ تي قائم هوندو. هن منصوبي جو مقصد رڳو هڪ نئون ايئرپورٽ ٺاهڻ نه، پر ڊاليان شهر جي وڌندڙ هوائي ٽرئفڪ، شور، محدود فضائي گنجائش ۽ توسيع جي مسئلن جو مستقل حل فراهم ڪرڻ آهي.

هن وقت ايئرپورٽ تي ٻه رن ويز ۽ هڪ جديد ٽرمينل جي تعمير جاري آهي، جتي هر سال 4 ڪروڙ 30 لک مسافر سفر ڪري سگهندا. ڊگهي مدي واري منصوبي تحت هتي 4 رن ويز ۽ هڪ وسيع ٽرمينل هوندو، جيڪو هر سال 8 ڪروڙ مسافرن کي سهولت فراهم ڪندو.

ساڍا 7 ارب ڊالرن جي لاڳت سان تيار ٿيندڙ هن منصوبي جو 37 سيڪڙو ڪم مڪمل ٿي چڪو آهي، جڏهن ته 3,500 کان وڌيڪ مزدور تعميراتي سرگرمين ۾ مصروف آهن. اميد ڪئي پئي وڃي ته 2035ع تائين هي ايئرپورٽ مڪمل طور فعال ٿي ويندو، جڏهن ته مصنوعي ٻيٽ کي ماحول دوست بڻائڻ لاءِ سوين وڻ پڻ لڳايا ويندا.