جاپان ۾ پوليس هڪ عورت کي پنهنجي سان گڏ رهندڙ هائوس ميٽ جا چپ سئي ۽ ڌاڳي سان سِي ڇڏڻ جي الزام ۾ گرفتار ڪري ورتو آهي.
پوليس موجب واقعي کانپوءِ 42 ورهين جي متاثر عورت شهر ڪوگا ۾ موجود گهر مان ڀڄي ويئي ۽ ويجهي دڪان تي پهچي هڪ ڪاغذ تي "مهرباني ڪري منهنجي مدد ڪريو" لکي ماڻهن کان مدد گهري.
بعد ۾ جاپان جي اوڀر واري صوبي ايباراڪي جي پوليس 49 ورهين جي عورت ماسائي ساڪورائي کي حملي جي شڪ ۾ گرفتار ڪيو.
پوليس موجب 29 جون تي پيش آيل واقعي دوران جوابدار عورت متاثره سان گڏ رهندي هئي ۽ ان ئي دوران هن مبينا طور پنهنجي هائوس ميٽ جا چپ سئي ۽ ڌاڳي سان سِي ڇڏيا.
پوليس واقعي جي وڌيڪ جاچ ڪري رهي آهي، جڏهن ته اها پڻ معلوم ڪيو پيو وڃي ته ڇا ان گهر ۾ ڪو ٽيون شخص به رهندو هو يا نه.
جاپان جي سرڪاري نشرياتي اداري اين ايڇ ڪي موجب زخمي عورت پوليس کي ٻڌايو ته هڪ تڪرار دوران جوابدار عورت ڪاوڙ ۾ اچي سندس چپ سِي ڇڏيا.
