آمريڪا ۾ هڪ حيران ڪندڙ ۽ دلچسپ واقعو سامهون آيو آهي، جتي ڏهه سال اڳ ٽوائلٽ ۾ ڪري گم ٿيل منگني جي انگوٺي آخرڪار پنهنجي اصل مالڪياڻي کي واپس ملي وئي.
رياست مشي گن ۾ هڪ پلمبنگ ڪمپني جي ٽيم سيوريج لائن جي مرمت دوران هڪ پائپ اندر چمڪندڙ شيءِ ڏٺي. جاچ ڪرڻ تي معلوم ٿيو ته اها هڪ منگني جي انگوٺي هئي، جيڪا لڳ ڀڳ ڏهه سال اڳ ٽوائلٽ ۾ ڪري گم ٿي وئي هئي.
پلمبنگ ڪمپني جي مالڪ گريگ جانسن موجب سندن ٽيم انگوٺي ملڻ بعد ان جي مالڪ کي ڳولڻ جو فيصلو ڪيو ۽ ان سلسلي ۾ سوشل ميڊيا تي پوسٽ به ڪئي.
پوسٽ ڏسڻ کانپوءِ هڪ عورت رابطو ڪيو ۽ ٻڌايو ته ڏهه سال اڳ هڪ گراهڪ جي شادي جي انگوٺي ٽوائلٽ ۾ ڪري گم ٿي وئي هئي، جنهن کي ڳولڻ جون گهڻيون ڪوششون ڪيون ويون هيون پر ڪاميابي نه ملي هئي.
بعد ۾ انگوٺي جي اصل مالڪياڻي ڪيرول اورم سان رابطو ڪيو ويو. جڏهن هن انگوٺي ڏٺي ته جذباتي ٿي وئي ۽ ٻڌايو ته اها ساڳي انگوٺي آهي جيڪا هن 1965ع ۾ پنهنجي شادي وقت حاصل ڪئي هئي.
سيوريج پائپ ۾ ڏهه سال رهڻ سبب انگوٺي تمام گهڻي خراب ۽ مٽيءَ سان ڀرجي وئي هئي، پر هڪ مقامي سنار ان کي صاف ۽ پالش ڪيو، جنهن بعد اها ٻيهر چمڪڻ لڳي.
انگوٺي واپس ملڻ تي ڪيرول اورم جذبات تي ضابطو نه رکي سگهي ۽ روئي پئي، جڏهن ته پلمبنگ ڪمپني جي عملي به انگوٺي مالڪياڻي تائين پهچائڻ تي خوشي جو اظهار ڪيو.
