ڪراچي: اسٽيٽ بينڪ جي گورنر جميل احمد چيو آهي ته مالي سال 2022ع کان هيل تائين پاڪستان جي پرڏيهي قرض ۾ ڪا به واڌ نه ٿي آهي.
ڪراچي ۾ ميڊيا سان ڳالهائيندي هن چيو ته مالي سال 26-2025ع جي پهرين 11 مهينن دوران ڪرنٽ اڪائونٽ سرپلس رهيو آهي، جڏهن ته ٻارهين مهيني جا انگ اکر گڏ ڪيا پيا وڃن. سندس چوڻ هو ته مالي سال جي پڄاڻي تي ڪرنٽ اڪائونٽ جو توازن صفر کان هڪ سيڪڙو جي وچ ۾ رهندو.
هن وڌيڪ چيو ته مالي سال جي آخر تائين زرِ مبادله جا ذخيرا 5.5 ارب ڊالر وڌي 18.4 ارب ڊالر ٿي ويا آهن، جڏهن ته 5 ارب ڊالر جا پنهنجا واجبات به گهٽ ڪيا ويا آهن.
گورنر اسٽيٽ بينڪ موجب گذريل چئن سالن دوران پرڏيهي قرض ساڳئي سطح تي برقرار رهيو آهي، جڏهن ته 2015ع کان 2022ع تائين ملڪ جو پرڏيهي قرض هر سال لڳ ڀڳ 6 ارب ڊالر وڌندو رهيو.
جميل احمد وڌيڪ چيو ته ايندڙ مالي سال ۾ ورڪرز جي ترسيلون گذريل مالي سال کان وڌيڪ رهنديون ۽ مالي سال 2026ع دوران اهي 41.5 ارب ڊالر کان وڌيڪ ٿيڻ جو امڪان آهي. هن چيو ته برآمدات ۾ وڌيڪ واڌ ٿيڻ تائين معيشت جو دارومدار ترسيل زر تي رهندو.
