لاهور: وفاقي قانون واري وزير اعظم نذير تارڙ اعلان ڪيو آهي ته هاءِ ڪورٽ جي ججن جي مقرري لاءِ پاڪستان جي تاريخ ۾ پهريون ڀيرو اميدوارن جا باقاعده انٽرويو ورتا ويندا، جنهن لاءِ ست رڪني ڪميٽي پڻ جوڙي وئي آهي.

هڪ تقريب کي خطاب ڪندي اعظم نذير تارڙ چيو ته قانون جي حڪمراني ۽ ان جي پاسداري انتهائي ضروري آهي. هن ٻڌايو ته وڪيلن ۽ سندن خاندانن جي علاج لاءِ نئين پاليسي تيار ڪئي پئي وڃي، جنهن تحت ڪينسر، گردن، جگر ۽ دل جي بيمارين جو علاج سرڪاري ۽ خانگي اسپتالن ۾ ڪرائڻ جون سهولتون فراهم ڪيون وينديون. هن وڌيڪ چيو ته پنجاب ۾ بار ايسوسيئيشنن لاءِ 135 ڪروڙ رپيا جاري ڪيا ويا آهن، جڏهن ته بار ووڪيشنل ڪورسز لاءِ وڌيڪ 2 ڪروڙ رپين جو اعلان پڻ ڪيو ويو آهي.

وفاقي وزير چيو ته جڏهن سول ججن ۽ ايڊيشنل سيشن ججن لاءِ امتحان ورتا وڃن ٿا ته پوءِ هاءِ ڪورٽ جي ججن لاءِ انٽرويو ڇو نه ٿيڻ گهرجن. سندس چوڻ هو ته ججن جي مقرري جو عمل مڪمل طور ميرٽ تي هئڻ گهرجي.

اعظم نذير تارڙ وڌيڪ چيو ته پهريون ڀيرو ججن جي ڪارڪردگي جو جائزو وٺڻ لاءِ آئيني نظام متعارف ڪرايو پيو وڃي. ججز ايويليويشن ڪميٽي هر سال جي آخر ۾ ججن جي ڪارڪردگي جو جائزو وٺندي، جڏهن ته غير تسلي بخش ڪارڪردگي جي صورت ۾ جوڊيشل ڪميشن ڏانهن ريفرنس موڪلي سگهجي ٿو، ۽ ضرورت پوڻ تي جج کي هٽائڻ جي سفارش پڻ ڪئي ويندي.