پاڪستاني اداڪارا حنا طارق چيو آهي ته هوءَ پنهنجي هر ڪم ۽ فيصلي کي تمام گهڻي سوچ ويچار سان ڪندي آهي. هڪ نجي ٽي وي شو ۾ ڳالهائيندي هن چيو ته شوبز جي زندگي سان گڏ هر فنڪار جي هڪ ذاتي زندگي به هوندي آهي ۽ هر ڪنهن کي هڪ نه هڪ ڏينهن شادي به ڪرڻي هوندي آهي، تنهنڪري هوءَ پنهنجي ڪيريئر ۾ به انهن ڳالهين کي ذهن ۾ رکندي آهي.
حنا طارق جو چوڻ هو ته هڪ عورت سماج جي تعمير ۾ اهم ڪردار ادا ڪندي آهي ۽ ڪيترين ئي نسلن جي تربيت ۽ رهنمائي عورت سان جڙيل هوندي آهي، تنهنڪري هوءَ هر قدم احتياط سان کڻندي آهي. هن چيو ته هوءَ پنهنجي لباس جي چونڊ به سوچ سمجهي ڪندي آهي ۽ شوٽنگ دوران به اهڙن منظرن کي ترجيح ڏيندي آهي جيڪي سندس والدين ۽ گهر وارا آرام سان ويهي ڏسي سگهن.
اداڪارا وڌيڪ چيو ته پاڪستاني شوبز انڊسٽري ۾ عام طور تي گهڻا بولڊ منظر نه ڏيکاريا ويندا آهن، پر ان جي باوجود هوءَ پنهنجي اصولن ۽ خانداني قدرن تي قائم رهندي آهي. سندس خيال آهي ته هڪ فنڪار کي پنهنجي پيشاور ذميوارين سان گڏ سماجي ۽ اخلاقي قدرن جو به خيال رکڻ گهرجي.
