دنيا جي سڀ کان وڏي سمنڊ، بحرالڪاهل، ۾ گم ٿي وڃڻ عام طور موت جي برابر سمجهيو ويندو آهي، پر جزائر ڪڪ سان تعلق رکندڙ مهاڻي جونيئر اپيوٽا اپيوٽا حيرت انگيز نموني 8 ڏينهن تائين سمنڊ ۾ اڪيلو ڀٽڪڻ باوجود زندهه بچي ويو.

جونيئر 11 جون تي پنهنجي آبائي ٻيٽ پوڪاپوڪا مان مڇي مارڻ لاءِ ننڍڙي ٻيڙي ۾ روانو ٿيو. ان وقت هوائن جي رفتار تمام تيز هئي ۽ هو مڇين جي تلاش ۾ سامونڊي پکين جو پيڇو ڪري رهيو هو. ڪجهه ئي دير بعد سندس ٻيڙي جو انجڻ خراب ٿي ويو، جنهن سبب هو کليل سمنڊ ۾ ڦاسي پيو.

هن وٽ انجڻ ٺيڪ ڪرڻ لاءِ اوزار نه هئا ۽ تيز هوائون ٻيڙي کي مسلسل ٻيٽ کان پري ڌڪي رهيون هيون. جونيئر موجب هڪ لمحي لاءِ هن سوچيو ته پاڻي ۾ ٽپو ڏئي تري واپس وڃجي، پر کيس خبر هئي ته اهو ناممڪن آهي، تنهن ڪري هن ٻيڙي ۾ رهڻ جو فيصلو ڪيو.

ايندڙ ڏينهن ۾ صورتحال وڌيڪ خراب ٿيندي وئي. تيز برسات، ٿڌي هوا ۽ وڏيون لهرون سندس لاءِ وڏو امتحان بڻجي ويون. زندهه رهڻ لاءِ هن ڪچي مڇي کاڌي ۽ بالٽي ۾ برسات جو پاڻي گڏ ڪري پيئندو رهيو. ٿڌ کان بچڻ لاءِ هن چادر ۽ پورٽيبل ڪولر جو استعمال ڪيو.

جونيئر ٻڌايو ته هو مسلسل ٻيڙي مان پاڻي ٻاهر ڪڍندو رهيو ۽ لهرن جي زور باوجود همت نه هاري. ٽئين ڏينهن هن پري هڪ روشني ڏٺي ۽ ان طرف وڃڻ جي ڪوشش ڪئي، پر تيز هوائن کيس مخالف رخ ۾ ڌڪي ڇڏيو.

اميد جي اها ڪهاڻي اٺين ڏينهن نئون موڙ اختيار ڪيو، جڏهن هن مٿان اڏامندڙ هڪ جهاز جو آواز ٻڌو. اهو نيوزي لينڊ ايئرفورس جو جهاز هو، جنهن سندس ٻيڙي کي ڏسي ويجهن ماهيگيرن کي اطلاع ڏنو.

جلد ئي تائيوان جو هڪ جهاز سندس مدد لاءِ پهتو ۽ جونيئر کي محفوظ طور بچائي ورتو. جهاز تي پهچڻ کان پوءِ کيس کاڌو، آرام ۽ پنهنجي خاندان سان رابطو ڪرڻ جو موقعو مليو. هن سڀ کان پهرين پنهنجي زال سان ڳالهائيندي چيو: "جان، مان ٺيڪ آهيان."

هاڻي جونيئر محفوظ آهي ۽ جلد پنهنجي گهر واپس ويندو. سندس چوڻ آهي ته هو مڇي مارڻ جو ڪم جاري رکندو، پر هاڻي اڳ کان وڌيڪ احتياط ڪندو.