بالي ووڊ جي بي تاج بادشاهه بگ بي اميتابھ بچن انڪشاف ڪيو آهي ته ڪم جي دٻاءَ سبب هن عمر ۾ به رات جو ننڊ مان جاڳي پوندو آهي ۽ ڪڏهن ڪڏهن سڄي رات به جاڳندو رهي ٿو.

ڀارتي ميڊيا موجب 5 ڏهاڪن تي ٻڌل ڪامياب ڪيريئر باوجود اميتابھ بچن اڄ به ڪم جي حوالي سان ذهني دٻاءَ جو شڪار آهي.

83 ورهين جي اميتابھ بچن پنهنجي هڪ بلاگ پوسٽ ۾ مصروف شيڊيول بابت ڳالهائيندي لکيو ته، "ڪم جي ڪري رات جو سمهي نٿو سگهان، ڪم ڪرڻ کان ڪجهه وقت پوءِ محسوس ڪندو آهيان ته اهو ان کان به بهتر نموني ڪري سگهجي پيو. جيڪڏهن اجازت ملي ته اهو ڪم ٻيهر به ڪري وٺندو آهيان، پر خبر ناهي پوندي ته اهو اڳ کان بهتر ٿيو آهي يا نه. جيڪي ماڻهو منهنجو ڪم ڏسن ٿا، اهي ئي ٻڌائي سگهن ٿا، پر اهي ئي خيال مون کي سڄي رات سمهڻ نٿا ڏين."

اميتابھ بچن پنهنجي بلاگ ۾ وڌيڪ لکيو ته ڪيترائي ڀيرا سڄي رات گذري ويندي آهي، پر ننڊ نٿي اچي. ڊاڪٽر هميشه گهٽ ۾ گهٽ 7 ڪلاڪ ننڊ ڪرڻ جو مشورو ڏيندا آهن، پر سندس لاءِ ڪيترائي ڀيرا ڪم ننڊ کان به وڌيڪ اهم بڻجي ويندو آهي.