ڀارت سان تعلق رکندڙ سوشل ميڊيا انفلوئنسر اوري انڪشاف ڪيو آهي ته هو سوشل ميڊيا تي صرف هڪ ريل ذريعي 76 لک ڀارتي رپيا ڪمائي وٺندو آهي.

تازو ئي ڀارتي ميڊيا کي ڏنل هڪ انٽرويو دوران ميزبان اوري (اورهان اواتراماني) کان سوال ڪيو ته هو نه ڪا نوڪري ڪندو آهي ۽ نه ئي سندس حوالي سان ڪا تڪراري ڳالهه سامهون آئي آهي، جڏهن ته هو بالي ووڊ جي تقريبن سڀني مشهور شخصيتن سان مختلف تقريبن ۾ به نظر ايندو آهي، پوءِ سندس وٽ ايترو پئسو ڪٿان اچي ٿو؟

ان سوال جي جواب ۾ اوري پنهنجي آمدني بابت انڪشاف ڪندي چيو ته سندس آمدني جو وڏو حصو برانڊز سان معاهدن ۽ خاص تقريبن ۾ شرڪت مان حاصل ٿيندو آهي.

هن چيو ته گذريل مهيني هن صرف هڪ سوشل ميڊيا ريل ذريعي 76 لک ڀارتي رپيا ڪمايا، جنهن تي ڪيترائي مداح حيران ٿي ويا، پر برانڊز پنهنجي مارڪيٽنگ لاءِ اهڙي رقم ادا ڪندا آهن.

اوري وڌيڪ چيو ته هو مختلف تقريبن جهڙوڪ ڊنر، شادين ۽ سالگرهن ۾ صرف شرڪت ڪرڻ لاءِ به 15 کان 25 لک ڀارتي رپين تائين معاوضو وصول ڪندو آهي.

انفلوئنسر وڌيڪ ٻڌايو ته هو تقريبن ۾ وڃي مهمانن سان ڳالهه ٻولهه ڪندو آهي ۽ تصويرن لاءِ پنهنجي مخصوص انداز ۾ پوز ڏيندو آهي، جيڪي سوشل ميڊيا تي تمام گهڻو وائرل به ٿي ويندا آهن.