اسلام آباد: پنجاب جي وڏي وزير مريم نواز چيو آهي ته کيس اڊيالا جيل ۾ اڪيلائي واري قيد ۾ رکيو ويو، جيل جي ڪمري اندر ئي واش روم موجود هو ۽ سمجهه ۾ نه ايندو هو ته نماز لاءِ جا نماز ڪٿي وڇائجي.

هن جيل سڌارن بابت جوڊيشل ڪانفرنس کي خطاب ڪندي چيو ته پنجاب ۾ 45 جيلون آهن، جن جي گنجائش 39 هزار قيدين جي آهي، پر هن وقت 70 هزار کان وڌيڪ قيدي موجود آهن.

مريم نواز چيو ته پنجاب حڪومت جيلن ۾ ڪيترائي سڌارا آندا آهن ۽ قيدين کي مختلف سهولتون فراهم ڪيون ويون آهن. سندس چوڻ هو ته قيدين لاءِ ڪيل اهي سڌارا سندس پنهنجي جيل واري تجربي کان پوءِ ممڪن بڻيا.

هن وڌيڪ چيو ته جيل ۾ ڪا به پرائيويسي نه هئي، ڪمري جي هڪ پاسي واش روم ۽ ٻئي پاسي سمهڻ جي جاءِ هئي. هن چيو ته جيڪي تڪليفون پاڻ برداشت ڪيون، انهن کي نظر ۾ رکندي پنجاب جي جيلن ۾ قيدين لاءِ وڊيو لنڪ سميت مختلف سهولتون فراهم ڪيون ويون آهن.

ان موقعي تي سنڌ جي وڏي وزير مراد علي شاهه چيو ته سنڌ حڪومت جيلن ۾ جامع سڌارا آڻي رهي آهي، جڏهن ته خيبرپختونخوا جي وڏي وزير سهيل آفريدي چيو ته جيل سڌارن جي شروعات اڊيالا جيل کان ٿيڻ گهرجي. بلوچستان جي وڏي وزير سرفراز بگٽي پڻ چيو ته بلوچستان ۾ جيل سڌارن ۽ قيدين جي ڀلائي لاءِ ڪيترائي قدم کنيا ويا آهن.