فٽبال ورلڊ ڪپ اهڙو ايونٽ آهي، جنهن ۾ پنهنجي پسنديده ٽيم کي لائيو ايڪشن ۾ ڏسڻ لاءِ مداح هر ممڪن ڪوشش ڪرڻ لاءِ تيار هوندا آهن.
اهڙو ئي هڪ دلچسپ واقعو تازو ڊيلاس ۾ جاپان ۽ نيدرلينڊز وچ ۾ کيڏيل ميچ دوران ڏسڻ ۾ آيو.
آمريڪا جي هڪ يونيورسٽي ۾ زير تعليم جاپاني شاگرد پنهنجي قومي ٽيم جو ميچ ڏسڻ لاءِ 1200 ميل سائيڪل تي سفر ڪيو.
22 ورهين جو يوٽو پنسلوانيا رياست جي پٽسبرگ يونيورسٽي ۾ تعليم حاصل ڪري رهيو آهي.
جاپاني ٽيم جو پهريون ميچ ٽيڪساس رياست جي شهر ڊيلاس ۾ ٿيو ۽ يوٽو پنهنجي قومي ٽيم کي ميدان ۾ کيڏندي ڏسڻ چاهيو.
ان مقصد لاءِ هن هوائي جهاز يا ٻي ٽرانسپورٽ استعمال ڪرڻ بدران آمريڪا جي مختلف رياستن مان سائيڪل تي سفر ڪرڻ کي ترجيح ڏني ته جيئن ميچ سان گڏ اهو سفر به يادگار بڻجي وڃي.
هن پنهنجي مهم جو آغاز مئي جي وچ ڌاري ڪيو.
جاپان جي ٽيم کي آمريڪي سرزمين تي کيڏندي ڏسڻ لاءِ هن هڪ سائيڪل ۽ سفر لاءِ ضروري سامان خريد ڪيو.
يوٽو جو چوڻ هو ته "اسان جي ٽيم هن سال چيمپيئن بڻجڻ واري آهي."
پنسلوانيا کان اتر ٽيڪساس تائين ڪيترن ئي هفتن تي ٻڌل هن سفر دوران يوٽو ڪيترين آمريڪي رياستن مان گذريو، جڏهن ته اهو سفر بلڪل به آسان نه هو.
سفر دوران کيس ڪيترن ئي چيلينجن کي منهن ڏيڻو پيو، جن مان هڪ اهو به هو ته سندس سائيڪل جو ٽائر ڇهه ڀيرا پنڪچر ٿيو.
هو هر شام سوشل ميڊيا تي پنهنجي دوستن کي سفر بابت آگاهه ڪندو رهيو ۽ نون علائقن جون تصويرون ۽ تجربا شيئر ڪندو رهيو.
مختلف علائقن ۾ ماڻهن سندس بهترين مهمان نوازي ڪئي، جڏهن ته کيس ڪيترين ئي برادرين بابت نيون ڳالهيون سکڻ جو موقعو پڻ مليو.
يوٽو جو چوڻ آهي ته هر انسان پنهنجي خوابن کي حقيقت جو روپ ڏئي سگهي ٿو، ۽ کيس اميد آهي ته سندس ڪهاڻي ٻين نوجوانن کي به همٿ ۽ حوصلا فراهم ڪندي ته هو مشڪلاتن کي منهن ڏئي پنهنجي خوابن کي ساڀيان ڪن.
