سنڌ ۾ عيد الاضحيٰ دوران سخت گرمي جي لهر (هيٽ ويو) جو امڪان آهي، جنهن سبب درجا حرارت ۾ 4 کان 6 ڊگري تائين واڌ ٿي سگهي ٿي۔

موسميات کاتي موجب 25 مئي تي مٿين فضائن ۾ هڪ هاءِ پريشر سسٽم ٺهڻ جو امڪان آهي، جيڪو 26 مئي تائين وڌيڪ طاقتور ٿي سگهي ٿو۔

هن سسٽم تحت 25 کان 31 مئي تائين سنڌ جي اڪثر ضلعن ۾ وچولي کان سخت هيٽ ويو جهڙي صورتحال پيدا ٿيڻ جو امڪان آهي۔

سخت گرمي سبب سکر، شڪارپور، قمبر شهدادڪوٽ، جيڪب آباد، لاڙڪاڻو، موهن جو دڙو، دادو، شهيد بينظير آباد، گھوٽڪي، خيرپور، نوشهرو فيروز ۾ درجا حرارت 47 کان 50 ڊگري سينٽي گريڊ تائين وڌي سگهي ٿو۔

ٻهراڙي سنڌ جي ٿرپارڪر، بدين، حيدرآباد، مٽياري، ٽنڊو محمد خان، عمرڪوٽ، ميرپور خاص، ڄامشورو ۽ سانگهڙ ۾ وڌ ۾ وڌ گرمي 44 کان 47 ڊگري سينٽي گريڊ تائين پهچي سگهي ٿي۔

ٻئي پاسي ڪراچي ۾ هيٽ ويو جو امڪان ناهي، پر موسم گرم ۽ گهڻو نمي وارو رهڻ جي توقع آهي، جنهن سبب وڌ ۾ وڌ گرمي 37 ۽ گهٽ ۾ گهٽ 27 ڊگري سينٽي گريڊ رڪارڊ ٿي سگهي ٿي۔

گرمي دوران صبح جي وقت هوا ۾ نمي جو تناسب 70 کان 80 سيڪڙو ۽ شام جي وقت 55 کان 65 سيڪڙو تائين رهڻ جو امڪان آهي۔ نمي وڌيڪ هجڻ سبب گرمي اصل درجي حرارت کان وڌيڪ محسوس ٿي سگهي ٿي۔

موسميات کاتي گرمي جي لهر دوران ٻارن، عورتن ۽ بزرگ شهرين کي احتياط ڪرڻ جي هدايت ڪئي آهي۔ غير ضروري طور تي سج ۾ نڪرڻ کان پاسو ڪيو (خاص طور تي 10 وڳي کان شام 4 وڳي تائين) ۽ گرمي دوران پاڻي جو استعمال وڌايو۔