پشاور: خيبرپختونخوا حڪومت ڪالام ۾ ڍنڍ سيف الله تي پيش آيل ٻيڙي حادثي جي جاچ لاءِ ٻه رڪني انڪوائري ڪميٽي قائم ڪري ڇڏي آهي.

صوبائي حڪومت جاري ڪيل نوٽيفڪيشن موجب اسپيشل سيڪريٽري بين الصوبائي رابطا محمد اياز کي ڪميٽي جو سربراهه مقرر ڪيو ويو آهي، جڏهن ته اسپيشل سيڪريٽري خزانه زبير احمد ڪميٽي جو ميمبر هوندو.

نوٽيفڪيشن موجب ڪميٽي ٻيڙي حادثي جا سمورا حقيقتون، واقعن جي ترتيب ۽ حادثي جي بنيادي سببن جو تفصيلي جائزو وٺندي. ان سان گڏ ٻيڙي جي فني حالت، حادثي وقت موسم، آپريشنل صورتحال ۽ ٻين لاڳاپيل معاملن جو به جائزو ورتو ويندو.

ڪميٽي اها به جاچ ڪندي ته ٻيڙي جي آپريشن دوران لاڳاپيل قانونن، اجازت نامن ۽ حفاظتي گهرجن تي عمل ڪيو ويو هو يا نه. ان کان علاوه ٻيڙي هلائيندڙ جي لائسنس، اهليت ۽ قانوني اجازت سان لاڳاپيل سڀني پهلوئن جو به جائزو ورتو ويندو.

نوٽيفڪيشن موجب حادثي وقت لائيف جيڪٽن، ريسڪيو سامان ۽ ٻين حفاظتي انتظامن جي موجودگي ۽ انهن جي مؤثر استعمال جو به تفصيلي جائزو ورتو ويندو. ڪميٽي انتظامي، قانوني ۽ ريگيوليٽري خامين جي نشاندهي ڪندي ۽ انهن جي تدارڪ لاءِ سفارشون پيش ڪندي، جڏهن ته مستقبل ۾ سياحتي ۽ تفريحي هنڌن تي اهڙن حادثن جي روڪٿام لاءِ به جامع سفارشون ڏيندي.

صوبائي حڪومت ڪميٽي کي هدايت ڪئي آهي ته هو پنهنجي مڪمل رپورٽ 7 ڏينهن اندر حڪومت کي پيش ڪري.