ممبئي: بالي ووڊ جي مشهور اداڪار سيف علي خان انڪشاف ڪيو آهي ته هو پنهنجي پٽن تيمور علي خان ۽ جهانگير علي خان سان مذهب بابت کلي ڳالهائيندو آهي ۽ کين اهي ئي قدر سيکاريندو آهي جيڪي کيس سندس ماءُ سيکاريا هئا.

ڀارتي ميڊيا موجب لنڊن ۾ هڪ تقريب دوران ڳالهائيندي سيف علي خان چيو ته هو پاڻ گهڻو مذهبي نه آهي، پر سندس ماءُ کيس ننڍپڻ کان اهو سيکاريو هو ته خدا هڪ آهي، ۽ هن پنهنجي ٻارن کي به ساڳيو سبق ڏنو آهي.

سيف علي خان ٻڌايو ته هن اهڙن تعليمي ادارن ۾ تعليم حاصل ڪئي جتي مختلف مذهبن جي تعليمات ۽ مذهبي تهوارن جو احترام ڪيو ويندو هو. هن چيو ته سندس اسڪول ۾ هر ڏينهن جي شروعات چرچ ۾ عبادت سان ٿيندي هئي. هڪ ڀيري هن اهو چئي ان عبادت کان بچڻ جي ڪوشش ڪئي ته سندس مذهب مختلف آهي، پر اسڪول انتظاميا سندس لاءِ هڪ مولوي صاحب جو بندوبست ڪري ڇڏيو، جنهن سبب اهو عذر به ڪم نه آيو.

هن وڌيڪ چيو ته هو چاهي ٿو ته سندس ٻار سڀني مذهبن جو احترام ڪرڻ سکن. سندس مطابق تيمور ۽ جهانگير نماز به پڙهندا، ٻين مذهبن جي عبادتن ۾ به شرڪت ڪندا ۽ ديوالي سان گڏ ڪرسمس جهڙا تهوار به ملهائيندا.

ياد رهي ته سيف علي خان ٻن مختلف مذهبن سان تعلق رکندڙ اداڪارائن سان شاديون ڪري چڪو آهي. سندس موجوده گهرواري ڪرينا ڪپور سان شادي 2012ع ۾ ٿي هئي، جڏهن ته ٻنهي کي تيمور علي خان ۽ جهانگير علي خان نالي ٻه پٽ آهن.

ان کان اڳ سيف علي خان 1991ع ۾ اداڪارا امرتا سنگهه سان شادي ڪئي هئي، جنهن مان کيس سارا علي خان ۽ ابراهيم علي خان نالي ٻه ٻار آهن. بعد ۾ 2004ع ۾ ٻنهي جي وچ ۾ طلاق ٿي وئي.