اسلام آباد: پاڪستان ۽ ڀارت وچ ۾ قيدين جي فهرستن جو باضابطه ڏي وٺ ڪيو ويو آهي. سفارتي ذريعن موجب پاڪستان ڀارت کي 715 قيدين تي ٻڌل فهرست فراهم ڪئي آهي، جنهن ۾ 409 شهري قيدي ۽ 306 مهاڻا شامل آهن.

ذريعن جو چوڻ آهي ته نئين دهلي ۾ پاڪستاني مشن جي سربراهه سعد وڙائچ قيدين جي فهرست ڀارتي حڪومت جي حوالي ڪئي، جڏهن ته پاڪستان ۾ ڀارتي مشن جي سربراهه گيتيڪا شريواستو ڀارت ۾ موجود پاڪستاني قيدين جي فهرست پاڪستاني اختيارين کي فراهم ڪئي.

سفارتي ذريعن موجب ٻنهي ملڪن وچ ۾ قيدين بابت معلومات جي مٽاسٽا قونصلر رسائي واري 2008ع جي معاهدي تحت ڪئي ويندي آهي. هن معاهدي موجب پاڪستان ۽ ڀارت هر سال باقاعدي طور هڪ ٻئي جي تحويل ۾ موجود قيدين ۽ مهاڻن جي فهرستن جو ڏي وٺ ڪندا آهن، جنهن جو مقصد قيدين جي سڃاڻپ، قونصلر سهولتن جي فراهمي ۽ سندن جلد واپسي جي عمل کي آسان بڻائڻ آهي.

واضح رهي ته پاڪستان ۽ ڀارت وچ ۾ قيدين ۽ مهاڻن جو معاملو ڪيترن سالن کان انساني همدردي جي بنيادن تي اهميت رکي ٿو، ۽ ٻنهي ملڪن طرفان وقت بوقت اهڙين فهرستن جي ڏي وٺ ذريعي قيدين بابت معلومات تازه ڪئي ويندي آهي.