جده: پاڪستان ڪرڪيٽ بورڊ (پي سي بي) جده ۾ جديد بين الاقوامي معيار جو ڪرڪيٽ اسٽيڊيم تعمير ڪرڻ جو اعلان ڪيو آهي.
پاڪستان ڪرڪيٽ بورڊ ۽ سعودي عرب ڪرڪيٽ فيڊريشن وچ ۾ ڪرڪيٽ جي واڌاري ۽ انفراسٽرڪچر جي ترقي لاءِ مفاهمتي يادداشت (ايم او يو) تي صحيحون ڪيون ويون، جنهن تحت جده ۾ جديد عالمي معيار جو ڪرڪيٽ اسٽيڊيم تعمير ڪيو ويندو.
معاهدي تي پاڪستان ڪرڪيٽ بورڊ جي چيئرمين محسن نقوي ۽ سعودي عرب ڪرڪيٽ فيڊريشن جي چيئرمين صحيحون ڪيون.
ايم او يو موجب، ٻنهي ادارن وچ ۾ ڪرڪيٽ انفراسٽرڪچر جي ترقي، آپريشنل معيارن، صلاحيتن ۾ واڌ ۽ راند جي فروغ جي مختلف شعبن ۾ گڏيل سهڪار ڪيو ويندو.
ان موقعي تي چيئرمين پي سي بي محسن نقوي چيو ته پاڪستان ڪرڪيٽ بورڊ سعودي عرب ۾ ڪرڪيٽ جي ترقي ۾ پنهنجو ڪردار ادا ڪرڻ تي فخر محسوس ڪري ٿو.
هن چيو ته ٻنهي ملڪن وچ ۾ اهڙي ڀائيواري قائم ڪئي پئي وڃي، جيڪا نه رڳو ڪرڪيٽ جي واڌاري ۾ مددگار ثابت ٿيندي، پر پاڪ-سعودي لاڳاپن کي به وڌيڪ مضبوط بڻائيندي.
معاهدي تحت جديد ڪرڪيٽ انفراسٽرڪچر جي تعمير سان گڏ سعودي عرب ۾ ڪرڪيٽ جي واڌاري، نوجوان رانديگرن جي تربيت ۽ کين نوان موقعا فراهم ڪرڻ تي پڻ ڌيان ڏنو ويندو.
سعودي عرب ڪرڪيٽ فيڊريشن جي چيئرمين چيو ته پاڪ-سعودي ڀائيواري صرف ڪرڪيٽ اسٽيڊيم جي تعمير تائين محدود نه رهندي، پر هي منصوبو مملڪت ۾ ڪرڪيٽ جي روشن مستقبل جي بنياد رکڻ ڏانهن اهم قدم ثابت ٿيندو.
