بالي ووڊ جي مشهور اداڪار عامر خان پنهنجي ٽئين شادي جي تاريخ جو اعلان ڪري ڇڏيو آهي.
رپورٽن موجب عامر خان ۽ گوري اسپرٽ جي شادي 5 جولاءِ تي ممبئي ۾ اداڪار جي رهائشگاهه تي سادگي سان ٿيندي.
عامر خان ميڊيا سان ڳالهائيندي چيو ته 5 جولاءِ اسان لاءِ خاص ڏينهن آهي، شادي جي هڪ ننڍڙي تقريب گهر ۾ رکي وئي آهي، جنهن ۾ ٻنهي خاندانن جي ماڻهن ۽ ڪجهه ويجهن دوستن کي دعوت ڏني وئي آهي.
هن وڌيڪ چيو ته سڀني جون دعائون گهرجن ته اسان خوش رهيون ۽ اسان جو گڏيل سفر سٺو گذري.
واضح رهي ته عامر خان پنهنجي 60هين سالگرهه جي موقعي تي پهريون ڀيرو گوري اسپرٽ کي دنيا آڏو متعارف ڪرايو هو ۽ سندن لاڳاپي جي باضابطه تصديق ڪئي هئي.
عامر خان جي پهرين شادي رينا دتا سان 1986ع ۾ ٿي، جيڪا 2002ع ۾ ختم ٿي وئي، جڏهن ته ٻي شادي ڪرن رائو سان 2005ع ۾ ٿي، جيڪا 2021ع ۾ عليحدگي تي ختم ٿي.
