اسلامي نظرياتي ڪائونسل جي اجلاس ۾ فيصلو ڪيو ويو آهي ته انبيا ڪرام ۽ ٻين مقدس شخصيتن جي شبيهه، بصري تمثيل يا انهن جي نمائندگي ڪندڙ ڪنهن به قسم جي بصري مواد جي اشاعت شرعي طور ناجائز آهي. اجلاس علامه ڊاڪٽر راغب حسين نعيمي جي صدارت هيٺ منعقد ٿيو، جنهن ۾ ملڪ جي موجوده صورتحال، قانوني معاملن ۽ عوامي مفاد سان لاڳاپيل مختلف معاملن تي غور ڪيو ويو.
اجلاس دوران منظور ڪيل قرارداد ۾ چيو ويو ته انبيا ڪرام ۽ مقدس هستين جي تصويرن يا انهن جي نمائندگي ڪندڙ بصري مواد جي اشاعت کان مڪمل طور پاسو ڪرڻ گهرجي، جيئن انهن پاڪ هستين جي مقام، مرتبي ۽ تقدس جو مڪمل احترام برقرار رهي. قرارداد ۾ زور ڏنو ويو ته اهڙن معاملن ۾ اسلامي تعليمات ۽ مذهبي حساسيتن جو خاص خيال رکڻ ضروري آهي.
اسلامي نظرياتي ڪائونسل پنهنجي قرارداد ۾ اهو به چيو ته پاڪستان اليڪٽرانڪ ميڊيا ريگيوليٽري اٿارٽي (پيمرا) طرفان جاري ڪيل نوٽيس هڪ خوش آئند قدم آهي ۽ ان معاملي ۾ ذميوار ماڻهن خلاف قانون موجب ڪارروائي ٿيڻ گهرجي. ڪائونسل موجب اظهارِ راءِ جي آزادي ۽ مذهبي حساسيتن جي احترام وچ ۾ ذميواراڻو توازن قائم رکڻ انتهائي ضروري آهي.
قرارداد ۾ وڌيڪ سفارش ڪئي وئي ته ميڊيا ادارن اندر مواد جي اڳواٽ جاچ پڙتال ۽ مؤثر اداري نگراني جو مضبوط نظام قائم ڪيو وڃي، جيئن مستقبل ۾ اهڙن واقعن کي روڪي سگهجي ۽ مذهبي تقدس جي حفاظت کي يقيني بڻائي سگهجي
