راولپنڊي: عدالت ۾ پيشي کانپوءِ واپسي دوران قيدي وين مان فرار ٿيل هڪ ٻئي قيدي کي گرفتار ڪيو ويو آهي.

راولپنڊي ۾ قيدي وين مان فرار ٿيل 14 حوالاتين جي گرفتاري ۾ وڌيڪ اڳڀرائي ٿي آهي ۽ پوليس انتهائي سنگين ڪيس ۾ ملوث هڪ ٻئي فرار ٿيل قيدي کي گرفتار ڪري ورتو آهي.

راولپنڊي پوليس جي ترجمان موجب گرفتار ٿيل جوابدار وهاب کي وڌيڪ قانوني ڪارروائي لاءِ اسلام آباد پوليس حوالي ڪيو ويو آهي.

ترجمان موجب، قيدي وين مان فرار ٿيل 14 حوالاتين مان هينئر تائين 8 کي گرفتار ڪيو ويو آهي.

واضح رهي ته 29 جون تي عدالت ۾ پيشي کانپوءِ قيدين کي اڊيالا جيل منتقل ڪيو پئي ويو ته چيڪنگ لاءِ قيدي وين روڪڻ دوران هڪ قيدي پوليس اهلڪارن جي اکين ۾ مرچون اڇلائي ڇڏيون، جنهن کانپوءِ 14 قيدي فرار ٿي ويا هئا.

بعد ۾ ڪجهه قيدين کي ٻيهر گرفتار ڪيو ويو، جڏهن ته پوليس اختيارين ڊيوٽي تي مقرر اڊيالا جيل جي گارڊ انچارج سميت 5 اهلڪارن کي پڻ حراست ۾ وٺي ڇڏيو هو.