پاڪستاني شوبز انڊسٽري جي باصلاحيت ۽ ورسٽائل اداڪارا سنم سعيد سوشل ميڊيا تي پنهنجي صورت ۽ حليي بابت ٿيندڙ تنقيد تي آخرڪار جواب ڏئي ڇڏيو آهي. تازو هوءَ عاصم يار جي شو “اسٽار اينڊ اسٽائل سيزن 5” ۾ شرڪت لاءِ پهتي، جتي هن پنهنجي ڪيريئر ۽ سوشل ميڊيا ٽرولنگ بابت کلي ڳالهه ٻولهه ڪئي.

شو دوران ميزبان پڇيو ته ڇا کيس ڪڏهن سوشل ميڊيا تي منفي تبصرن يا ٽرولنگ جو سامنا ٿيو آهي؟ سنم سعيد ٻڌايو ته خوش قسمتي سان کيس پنهنجي ڪيريئر ۾ تمام گهٽ منفي رويو ڏسڻو پيو آهي، جڏهن ته ڪڏهن ڪڏهن ماڻهن طرفان صرف “ڪوجي” يا “کوجي” جهڙا لفظ استعمال ڪيا ويا.

ميزبان وضاحت ڪئي ته “ڪوجي” جو مطلب روايتي خوبصورتي جي معيار تي پورو نه لهندڙ چهرو ۽ “کوجي” جو مطلب جاسوس آهي. ان تي ردعمل ڏيندي سنم سعيد اعتماد سان چيو ته جيڪڏهن کيس صرف “ڪوجي” چيو ويو آهي ته هوءَ ان کي ٽرولنگ نٿي سمجهي، ڇو ته اهو دراصل ان جي خالق تي تبصرو آهي. هن چيو، “الله مون کي جهڙو بڻايو آهي، مان ان تي مطمئن آهيان.”

عاصم يار گفتگو دوران اهو به چيو ته پاڪستان ۾ عام طور تي گوري رنگت ۽ مخصوص نقشن کي خوبصورتي جو معيار سمجهيو ويندو آهي، جڏهن ته دنيا جي ٻين حصن ۾ ڪڻڪ رنگت کي به ساراهيو ويندو آهي. ان تي سنم سعيد چيو ته سندس چهرو ڪلاسيڪل پاڪستاني فيچرز رکي ٿو ۽ اڪثر ماڻهو کيس مختلف اداڪارائن سان مشابهت ڏين ٿا.