بالي ووڊ جي مشهور اداڪار شرياس تلپڊي انڪشاف ڪيو آهي ته سپر اسٽار شاهه رخ خان ۽ فلمساز فرح خان ممبئي ۾ سندس پهريون گهر خريد ڪرڻ ۾ اهم ڪردار ادا ڪيو. ڀارتي ميڊيا موجب فرح خان پنهنجي ڪوڪنگ بلاگ لاءِ تازو شرياس تلپڊي جي گهر جو دورو ڪيو، جتي ٻنهي ماضي جون يادون تازيون ڪيون.
ڳالهه ٻولهه دوران شرياس تلپڊي ٻڌايو ته هو فلم "اوم شانتي اوم" جي ڪري پنهنجو پهريون گهر خريد ڪرڻ جي قابل بڻيو. هن چيو ته جڏهن هو گهر لاءِ قرض حاصل ڪرڻ خاطر بينڪ ويو ته شروعاتي طور تي سندس قرض جي درخواست منظور ٿيڻ جا امڪان گهٽ هئا. بينڪ ۾ موجود هڪ خاتون کانئس پڇيو ته هو ڪهڙي فلم تي ڪم ڪري رهيو آهي، جنهن تي هن جواب ڏنو ته هو "اوم شانتي اوم" ۾ ڪم ڪري رهيو آهي، جنهن جي هدايتڪاره فرح خان آهي ۽ جنهن ۾ مرڪزي ڪردار شاهه رخ خان ادا ڪري رهيو آهي.
شرياس موجب بينڪ جي خاتون کيس شاهه رخ خان ۽ فرح خان طرفان تصديقي خط آڻڻ لاءِ چيو. ان کان پوءِ هن فرح خان سان رابطو ڪيو، جنهن ٻن ڏينهن اندر شاهه رخ خان کان خط وٺي ڏنو. شرياس ٻڌايو ته خط جمع ڪرائڻ کان پوءِ ساڳئي شام بينڪ سندس گهر واري قرض جي درخواست منظور ڪري ڇڏي.
واضح رهي ته "اوم شانتي اوم" سال 2007ع ۾ رليز ٿي هئي، جيڪا ان سال جي ڪامياب ترين فلمن مان هڪ هئي. فلم ۾ شاهه رخ خان سان گڏ ديپيڪا پڊوڪون سميت ڪيترن ئي مشهور اداڪارن اهم ڪردار ادا ڪيا هئا.
