پاڪستاني اداڪار سھيل سمير شادين ۽ خانداني نظام بابت ڳالهائيندي چيو آهي ته ڪجه والدين پنهنجي ڌيئرن کي اهڙي سوچ سان رخصت ڪن ٿا جو هو شادي کان پوءِ پنهنجي مڙس کي گڏيل خاندان کان الڳ ڪرڻ جي ڪوشش ڪن، جيئن کين ساس جي دٻاءُ کي منهن نه ڏيڻو پوي.
تازو هڪ انٽرويو دوران سھيل سمير چيو ته ڪجه والدين پنهنجي ڌيئرن جي اهڙي تربيت ڪن ٿا، جنهن جي نتيجي ۾ هو شادي کان پوءِ مڙس کي سندس والدين کان پري ڪرڻ جي ڪوشش ڪن ٿيون. هن چيو ته اڄڪلهه ڪجه نيون ڪنوارون اهو سمجهن ٿيون ته شادي کان پوءِ سسرال جي گهر ۾ سمورا اختيار صرف انهن وٽ هجڻ گهرجن ۽ مڙس جا والدين پس منظر ۾ هليا وڃن.
سندس چوڻ هو ته ڪيترائي ماڻهو اهو وساري ڇڏين ٿا ته ساس به هڪ عورت هوندي آهي، جيڪا ڪڏهن پاڻ به نئين ڪنوار بڻجي پنهنجي سسرال ۾ آئي هئي ۽ زندگي جا مختلف مرحلا طئي ڪيا هوندا آهن.
سھيل سمير ڇوڪرين جي قربانين کي ساراهيندي چيو ته هڪ ڌيءُ پنهنجي والدين، گهر ۽ سڃاتل ماحول کي ڇڏي نئين خاندان ۾ وڃي ٿي، جيڪا وڏي قرباني آهي. هن چيو ته مڙسن کي گهرجي ته هو پنهنجي زالن جو خاص خيال رکن ۽ کين عزت، محبت ۽ احترام ڏين.
هن وڌيڪ چيو ته هر پيءُ پنهنجي ڌيءُ کي وڏين اميدن ۽ اعتماد سان رخصت ڪندو آهي، تنهنڪري نئين ڪنوار کي سندس نئين گهر ۾ محبت، عزت ۽ تحفظ فراهم ڪرڻ مڙس ۽ سندس خاندان جي اهم ذميواري آهي.
