مڪو مڪرمہ ۾ مسجد الحرام اندر غُسلِ ڪعبه جي سالياني روح پرور تقريب وڏي عقيدت ۽ احترام سان منعقد ڪئي وئي، جنهن ۾ آبِ زمزم ۽ عرقِ گلاب استعمال ڪيو ويو. تقريب ۾ مختلف ملڪن جي سفارتڪارن، اسلامي تعاون تنظيم (OIC) جي نمائندن، عالمن، مشائخن ۽ ٻين اهم شخصيتن شرڪت ڪئي.
غُسلِ ڪعبه جي هن بابرڪت تقريب دوران خادم الحرمين الشريفين جي نيابت ڪندي مڪي جي گورنر شهزادو سعود بن مشعل فجر جي نماز کان پوءِ ڪعبه شريف جي ڌوئڻ واري عمل ۾ شرڪت ڪئي. تقريب دوران ڪعبه شريف جي اندروني حصي کي آبِ زمزم ۽ عرقِ گلاب سان صاف ڪيو ويو، جڏهن ته شرڪت ڪندڙن دعائون ۽ عبادتون پڻ ڪيون.
ان موقعي تي زائرين جي محدود تعداد کي طواف جي اجازت ڏني وئي، جڏهن ته سيڪيورٽي جا انتهائي سخت انتظام ڪيا ويا هئا ته جيئن تقريب پرامن ۽ منظم طريقي سان مڪمل ٿي سگهي.
انتظاميا موجب ڪعبه شريف جي غلاف، يعني ڪِسوه، جي حفاظت کي يقيني بڻائڻ لاءِ غُسل دوران ڪعبه جي دروازي تي لڳل پردو مٿي ڪيو ويو، جنهن سان اندر آساني سان رسائي ممڪن ٿي سگهي. هي ساليانو روحاني منظر دنيا ڀر جي مسلمانن لاءِ وڏي عقيدت ۽ محبت جو مرڪز بڻيل رهيو.
