ڀارت: هلندڙ بس جي دريءَ مان ٻاهر جهاتي پائڻ سبب هڪ نوجوان جو مٿو ڌڙ کان ڌار ٿي ويو.
ڀارتي ميڊيا موجب، رياست ڪرناٽڪا جي ضلعي ڌارواڙ ۾ واقع ڪنڊگول ڀرسان هلندڙ بس ۾ انتهائي افسوسناڪ واقعو پيش آيو، جتي بس جي دريءَ مان مٿو ٻاهر ڪڍڻ سبب هڪ شاگرد فوت ٿي ويو.
ميڊيا رپورٽن موجب، 17 ورهين جو شاگرد پڪاريش ڳوٺ شيرور جو رهواسي هو. هو هبلي کان لڪشمي شور ويندڙ بس ۾ سوار هو ۽ بس جي پوئين حصي ۾ ويٺو هو.
پوليس موجب، پڪاريش مبينا طور ٿُڪڻ لاءِ دريءَ مان پنهنجو مٿو ٻاهر ڪڍيو هو ته ان دوران پٺيان ايندڙ هڪ تيز رفتار ٽرڪ کيس ٽڪر هڻي ڇڏيو.
پوليس موجب، ٽرڪ جي ٽڪر لڳڻ کانپوءِ نوجوان جو مٿو ڌڙ کان ڌار ٿي ويو ۽ هو موقعي تي ئي فوت ٿي ويو.
