مقبوضه بيت المقدس: آمريڪا مقبوضه بيت المقدس (يروشلم) ۾ نئون ۽ مستقل سفارتخانو تعمير ڪرڻ لاءِ باضابطه معاهدي تي صحيحون ڪري ڇڏيون آهن.
اربع ڏينهن ٿيل هڪ تقريب دوران اسرائيل جي پرڏيهي وزير گيڊئين سار ۽ اسرائيل ۾ آمريڪي سفير مائڪ هڪابي مقبوضه بيت المقدس ۾ مستقل آمريڪي سفارتخاني لاءِ زمين جي الاٽمينٽ وارو معاهدو شرڪت ڪندڙن آڏو پيش ڪيو.
اسرائيل ۾ آمريڪي سفير مائڪ هڪابي اسرائيلي پرڏيهي وزارت ۾ ٿيل صحيحي تقريب دوران چيو ته آمريڪا يروشلم کي يهودي عوام جو ازلي، مقامي ۽ هميشه جو گاديءَ وارو شهر تسليم ڪري ٿو.
هن وڌيڪ چيو ته آمريڪا يروشلم جي سرزمين تي پنهنجو جهنڊو نصب ڪندو ۽ هتي هڪ نئون، مستقل سفارتي ڪمپليڪس تعمير ڪيو ويندو، جيڪو اسرائيل ۾ آمريڪي سفارتي سرگرمين جو مرڪزي مرڪز هوندو.
اسرائيل جي پرڏيهي وزير هن معاهدي جي آجيان ڪندي چيو ته هي ٻنهي ملڪن جي وچ ۾ "ناقابلِ شڪست اتحاد" جي عڪاسي ڪري ٿو.
اعلاميي موجب، آمريڪي سفارتخانو ڏکڻ مقبوضه بيت المقدس ۾ واقع ايلنبي ڪمپائونڊ ۾ تعمير ڪيو ويندو.
ٻئي پاسي، اسرائيلي انساني حقن جي تنظيم عداله سفارتخاني جي تعمير جي مذمت ڪندي چيو آهي ته هي قدم "هڪ گهري تاريخي ناانصافي کي قانوني حيثيت ڏيڻ جي برابر آهي".
واضح رهي ته مقبوضه بيت المقدس اسرائيل ۽ فلسطين جي وچ ۾ سڀ کان وڌيڪ تڪراري شهرن مان هڪ آهي، جتي فلسطيني اوڀر يروشلم کي مستقبل جي فلسطيني رياست جو گاديءَ وارو شهر بڻائڻ چاهين ٿا.
واضح رهي ته آمريڪي صدر ڊونلڊ ٽرمپ پنهنجي پهرين صدارتي دور ۾ ڊسمبر 2017ع دوران يروشلم کي اسرائيل جو گاديءَ وارو شهر تسليم ڪندي آمريڪي سفارتي مشن کي تل ابيب مان منتقل ڪرڻ جو حڪم ڏنو هو.
