ڪاراڪاس: وينزويلا ۾ ڪجهه ڏينهن اڳ آيل تباهه ڪندڙ زلزلي جي نتيجي ۾ ارجنٽينا جي مشهور فٽبالر لوڪاس تريخو جي زال ۽ ٻن ٻارن جي فوت ٿيڻ جي تصديق ڪئي وئي آهي.

پرڏيهي ميڊيا موجب زلزلي وقت لوڪاس تريخو جي زال يانينا مارانيلا ۽ سندن ٻه ٻار آرون تريخو ۽ آئينهوا تريخو سامونڊي علائقي پلايا گراندي ۾ موجود هئا، جتي سندن رهائشي عمارت زلزلي سبب ڊهي پئي.

واقعي کان پوءِ فٽبالر جي گهرواري ۽ ٻار لاپتا ٿي ويا هئا، پر امدادي ٽيمن بعد ۾ ٽنهي جي فوت ٿيڻ جي تصديق ڪئي. لوڪاس تريخو ان وقت پنهنجي ٽيم سان گڏ راڄڌاني ڪاراڪاس ۾ ايندڙ ميچ جي تيارين ۾ مصروف هو.

ڪلب پاران جاري ڪيل بيان ۾ افسوسناڪ واقعي جي تصديق ڪندي فٽبالر ۽ سندس خاندان سان همدردي ۽ تعزيت جو اظهار ڪيو ويو آهي.

اقوام متحده موجب 24 جون تي وينزويلا ۾ آيل زلزلي کان لڳ ڀڳ 67 لک 60 هزار ماڻهو متاثر ٿيا آهن، جڏهن ته تقريباً 1500 ماڻهو فوت ۽ هزارين اڃا تائين لاپتا آهن.