چين جي هڪ چڙيا گهر طرفان هڪ انوکي نوڪري جو اشتهار سوشل ميڊيا تي وائرل ٿي ويو آهي، جنهن ۾ ملازمن کي ريڇ جو ڪاسٽيوم پائي سياحن کي تفريح فراهم ڪرڻي آهي. هن نوڪري جي بدلي ۾ سالانه هڪ لک يوان، يعني تقريباً 41 لک پاڪستاني رپيا کان وڌيڪ تنخواهه ڏني پئي وڃي.

هي نوڪري صوبو هينان جي شهر لوهي جي لوهي وائلڊ لائيف زو طرفان پيش ڪئي وئي آهي. شرط موجب اميدوار جي عمر گهٽ ۾ گهٽ 18 سال هئڻ گهرجي ۽ جسماني طور تي فِٽ هجڻ لازمي آهي. روزانو لڳ ڀڳ 6 ڪلاڪ ڪم ڪرڻو پوندو، جڏهن ته هر مهيني 4 ڏينهن موڪل به ملندي.

نوڪري دوران ملازم کي ڳالهائڻ جي اجازت نه هوندي، پر مختلف آواز ڪڍي سگهندا. انهن کي سياحن کان کاڌو وٺڻ ۽ انهن سان رابطي ۾ رهڻ لاءِ ريڇ جي روپ ۾ ئي ڪم ڪرڻو پوندو. دلچسپ ڳالهه اها آهي ته جيڪڏهن ٿڪ محسوس ٿئي ته آرام ڪري سگهجي ٿو، ۽ جيڪڏهن توانائي هجي ته هلڻ، ٽپڻ يا وڻن تي چڙهڻ جهڙا ڪم به ڪري سگهجن ٿا.

چڙيا گهر موجب هي نوڪري نه رڳو سوشل ميڊيا تي مشهور ٿي رهي آهي پر سوين ماڻهو اڳ ئي ان لاءِ درخواستون ڏئي چڪا آهن، جڏهن ته انتظاميا کي اميد آهي ته ان سان سياحن جو تعداد ۽ آمدني ٻنهي ۾ واڌ ٿيندي.