سوشل ميڊيا تي "اسپائيڊر مين" جي نالي سان مشهور يمني نوجوان آتش فشاني کڏي ۾ ڪري فوت ٿي ويو.
پرڏيهي ميڊيا موجب 30 ورهين جو نوجوان الققع ابن انطار جمعي جي ڏينهن بغير حفاظتي سامان جي ملڪ جي ڏکڻ اولهه ۾ موجود آتش فشاني کڏي جي اوچين ۽ سڌين چٽانن تي اسپائيڊر مين وانگر چڙهڻ جي ڪوشش ڪري رهيو هو ته حادثي جو شڪار ٿي ويو.
رپورٽن موجب هرداه ڊيم آتش فشاني کڏو يمن جي مشهور ماڳن مان هڪ آهي. نوجوان انهن عمودي چٽانن تي اسٽنٽ ڏيکاري رهيو هو ته اوچتو سندس گرفت ڇٽي وئي ۽ هو کڏي ۾ ڪري پيو.
ميڊيا رپورٽن مطابق نوجوان جو لاش غوطه خورن کي 120 ميٽر ويڪري کڏي اندر پاڻي جي سطح کان 30 ميٽر هيٺ مليو.
ان حوالي سان يمن جي سول ڊفينس اٿارٽي ريسڪيو ٽيم جي ڪوششن کي ساراهيندي چيو ته لاش کي ٻاهر ڪڍڻ وارو آپريشن انتهائي خطري وارو هو.
واضح رهي ته 30 ورهين جو هي نوجوان سوشل ميڊيا تي وڏي تعداد ۾ فالوورز رکندو هو ۽ خطرناڪ ايڪروبيٽڪ اسٽنٽس سبب خاص شهرت حاصل ڪئي هئي.
